శేరిలింగంపల్లి, ధరణి న్యూస్, సెప్టెంబర్ 25: సాహితి ఇన్‌ఫ్రాటెక్ వెంచర్స్ ఇండియా ప్రైవేట్ లిమిటెడ్ సంస్థ చేపట్టిన రూ. 842 కోట్ల భారీ మోసం, మనీలాండరింగ్ కేసులో శేరిలింగంపల్లి ఎమ్మెల్యే అరెకపూడి గాంధీకి ఎన్‌ఫోర్స్‌మెంట్ డైరెక్టరేట్ (ఈడీ) సమన్లు జారీ చేసింది. ఈ కేసు దర్యాప్తులో భాగంగా ఈ నెల 27వ తేదీన తమ ఎదుట హాజరు కావాలని ఆదేశించింది. సాహితి ఇన్‌ఫ్రా ఖాతాల నుంచి ఎమ్మెల్యే బ్యాంక్ ఖాతాలకు దాదాపు రూ. 2.1 కోట్లు మళ్లించినట్లు అధికారులు గుర్తించారు. ఈ లావాదేవీల వెనుకున్న నిజమైన స్వభావం, ఉద్దేశం ఏమిటనే దానిపై ఈడీ సుదీర్ఘంగా ఆరా తీస్తోంది. అంతేకాకుండా, ఈ మనీలాండరింగ్ నెట్‌వర్క్‌తో సంబంధం ఉన్న ఆస్తులు, మళ్లించిన నిధుల లభ్యతపై కూడా ఈడీ ప్రత్యేకంగా దృష్టి సారించింది.
ప్రీ-లాంచ్ ఆఫర్ల పేరుతో కొనుగోలుదారుల నుంచి భారీగా నిధులు సేకరించిన సాహితి ఇన్‌ఫ్రా, ఫ్లాట్లు మరియు విల్లాలు ఇస్తామని నమ్మించి ప్రాజెక్టులను సకాలంలో పూర్తి చేయకుండా మోసానికి పాల్పడిందంటూ బాధితులు ఇచ్చిన ఫిర్యాదుల ఆధారంగా తెలంగాణ పోలీసులు పలు ఎఫ్‌ఐఆర్‌లు నమోదు చేశారు. వీటి ఆధారంగా ఈడీ దర్యాప్తును వేగవంతం చేసింది. ప్రారంభంలో రూ. 248 కోట్ల మోసం జరిగినట్లు భావించినప్పటికీ, తదుపరి దర్యాప్తులో ఈ కుంభకోణం విలువ ఏకంగా రూ. 842 కోట్లకు చేరినట్లు ఈడీ అంచనా వేసింది. కొనుగోలుదారుల నుంచి వసూలు చేసిన సొమ్మును సంస్థ ఎండీ బి. లక్ష్మీనారాయణ, మాజీ డైరెక్టర్ సందు పూర్ణచంద్రరావు తమ సొంత, కుటుంబ సభ్యుల ఖాతాలకు మళ్లించినట్లు బలమైన ఆరోపణలు ఉన్నాయి.
ఈ వ్యవహారంలో దాదాపు రూ. 126 కోట్ల మేర నిధుల దుర్వినియోగం జరిగినట్లు, అలాగే అక్రమంగా సంపాదించిన సొమ్ముతో బినామీ పేర్లతో భారీగా ఆస్తులు కొనుగోలు చేసినట్లు ఈడీ విచారణలో తేలింది. ఈ కుంభకోణంపై కఠిన చర్యలు చేపడుతున్న ఈడీ, ఇప్పటివరకు 56 బ్యాంక్ ఖాతాలను ఫ్రీజ్ చేయడంతో పాటు రెండు విడతల్లో (రూ. 161 కోట్లు మరియు రూ. 12.6 కోట్లు) భారీగా ఆస్తులను అటాచ్ చేసింది. గతంలో ఈ సంస్థ ప్రకటనల్లో కనిపించిన ప్రముఖ నటుడు జగపతిబాబును సైతం ఈడీ సాక్షిగా విచారించగా, సంస్థ ఎండీ బి. లక్ష్మీనారాయణను 2024 సెప్టెంబర్‌లోనే అధికారులు అరెస్ట్ చేశారు. సెప్టెంబర్ 27న ఎమ్మెల్యే అరెకపూడి గాంధీ విచారణ అనంతరం ఈ కేసులో మరిన్ని కీలక పరిణామాలు చోటుచేసుకునే అవకాశం ఉంది.
సాహితి ఇన్‌ఫ్రా కేసులో ఎమ్మెల్యే అరెకపూడి గాంధీకి ఈడీ సమన్లు!
